Федерация Халықаралық студенттер арасындағы бағдарламалау сайысының (ICPC) 1/8 финалдық кезеңін Қазақстандағы жоғары оқу орындарында тікелей өткізуді жоспарлап отыр. Бұл жобаның мақсаты – Қазақстан университеттері көпшілігінің осы беделді жарысқа қатысу мүмкіндігін қамтамасыз ету.
ICPC – әлемнің 110 еліндегі ең мықты жоғары оқу орындарын біріктіретін ең ірі студенттік командалық бағдарламалау олимпиадасы. ICPC жарысына Стэнфорд университеті, Гарвард университеті, Калифорния технологиялық институты, Массачусетс технологиялық институты, Санкт-Петербург мемлекеттік университеті, М.В. Ломоносов атындағы Мәскеу мемлекеттік университеті, Варшава университеті, Ватерлоо университеті және басқа да көптеген атақты университеттер қатысады.
ICPC жарысы жыл сайын Олимпиада ойындарына қатысатын спортшылар санынан да асып түсетін қатысушылардың ауқымды санын тартады. Мысалы, 2017 жылы ICPC жарысына 103 елден 46 381 адам қатысса, Рио-де-Жанейрода өткен жазғы Олимпиада ойындарының барлық кезеңдеріне 11 544 спортшы қатысты.
ICPC жарысына қатысу қатысушыларға келесі мүмкіндіктерді ашады:
ICPC жарысына қатысу талантты спорттық бағдарламашыларды іздейтін әлемнің жетекші IT компанияларының назарын аударады. ICPC жеңімпаздары мен жүлдегерлері индустрияда бедел мен жоғары бағаға ие болады. Мұндай жарыстарда табысқа жету көптеген мансаптық мүмкіндіктерге, соның ішінде ірі IT компанияларында жұмыс істеу, жоғары басшылық лауазымдарды атқару, тіпті университеттерде бағдарламалаудан сабақ беру сияқты мүмкіндіктерге жол ашады.
ICPC жарысына қатысу бағдарламалау машықтарын ғана емес, талдамалық ойлау, мәселелерді шешу, командалық жұмыс және уақытты басқару сияқты басқа да маңызды машықтарды дамытады. Бұл машықтар қызметтің кез келген саласында құнды және кәсіби мансапта да, күнделікті өмірде де пайдалы болып табылады.
Қазақстанда ICPC 1/8 финалын өткізу келесі артықшылықтарды береді:
Жарыстар студенттер арасындағы бағдарламалаудың дамуына және бағдарламалауға деген қызығушылықтың арта түсуіне септігін тигізеді.
Университеттер арасындағы бәсеке Қазақстанды халықаралық деңгейде танытуға лайықты үздік командаларды анықтауға көмектеседі.
ICPC 1/8 финалы мықты командаларды қалыптастырудың бастапқы нүктесі болып табылады және жоғары нәтижелерге жету мүмкіндігін арттырады.
Қазақстандағы ICPC 1/8 финалы – чемпионаттағы маңызды кезең, ол спорттық бағдарламалауды дамытуға, дарынды студенттерді анықтауға және елді халықаралық аренада лайықты түрде таныта алатын мықты командалар құруға көмектеседі.